அண்ணாமலை டெல்லி பயணம்.. அமித் ஷாவை சந்திக்கிறார்

தமிழக பாஜக தலைவர் அண்ணாமலை இன்று (மார்ச் 26) டெல்லி புறப்பட்டுச் சென்றார். உள்துறை அமைச்சர் அமித் ஷாவை நாளை அண்ணாமலை சந்திக்க இருப்பதாக தகவல்கள் வெளியாகி உள்ளன.

பாஜக மாநிலத் தலைவர் அண்ணாமலை இன்றிரவு டெல்லி புறப்பட்டுச் சென்றார். வியாழக்கிழமை அவர் உள்துறை அமைச்சர் அமித் ஷா மற்றும் கட்சியின் மூத்த நிர்வாகிகளை சந்திக்கவிருப்பதாக கூறப்படுகிறது. தமிழக அரசியல் நிலவரம், அதிமுக கூட்டணி தொடர்பான தமிழக பாஜகவின் நிலைப்பாடு குறித்து பாஜக தேசிய தலைமை அண்ணாமலையை டெல்லிக்கு அழைத்திருப்பதாக கூறப்படுகிறது.

ஏற்கெனவே, நேற்றைய அதிமுக சந்திப்பின்போதே, தேசிய ஜனநாயக கூட்டணியில் அதிமுக இடம்பெறுவது குறித்தும், கட்சியில் இருந்து நீக்கப்பட்டவர்கள் பாஜகவுடன் நெருக்கமாக இருப்பதால், அவர்கள் தொடர்பாக எடுக்கப்பட வேண்டிய நிலைப்பாடுகள் குறித்து விவாதிக்கப்பட்டதாக கூறப்படுகிறது. இந்நிலையில், தமிழக பாஜகவின் நிலைப்பாடு குறித்து தேசிய தலைமை அறிய விரும்புவதால் அண்ணாமலை டெல்லி சென்றுள்ளதாகவும் கூறப்படுகிறது.